如果大家同筆者差唔多年紀，無論係隔空連線定係上電腦堂「四手聯彈」一個keyboard，相信中小學嘅時候都一定玩過《小朋友齊打交》(LF2)。話說「連登」早排有post話小熊出NFT (non-fungible token)，於是就夾埋同事膽粗粗email呢位兒時偶像，點知佢一口答應，於是就有呢篇訪問嘅誕生。

（利申：文末有彩蛋，仲有畀眾多年青人嘅搵工tips呀～）

▲ 如果大家未玩過LF2，想當年呢隻本土game仲上埋德國遊戲雜誌㗎～

「寫game？純粹為興趣」

小熊同好多人一樣，細細個就已經好鍾意打機，但佢鍾意打機嘅程度，係癲到佢小學嗰陣就會研究埋啲紅白機game背後嘅sprite點修改：「我初中就已經會試吓寫啲game出嚟，再擺入隻磁碟度拎返學畀同學玩，睇吓佢哋啲反應點。」

▲ In case大家唔知磁碟係咩，畀上圖大家做參考（此乃CD前產物）

所以佢由小學開始就已經決定咗行寫game呢條路，咁啱中學又去過CU參觀，於是就好順理成章地入咗CU讀Computer Science。

關於《小朋友齊打交二》，坊間都話呢隻game係小熊嘅FYP (final-year project)，但筆者代小熊澄清，呢個只係小熊同浩然自己嘅project咋！

「嗰陣同浩然整完LF2出嚟就擺咗上CU server，點知隻game紅到全世界都有人download，炸『冧』CU咗個server，所以嗰陣其實『燒』咗好多錢去租server，純粹想多啲人download到嚟玩。」就係咁，LF2就咁啱變成小熊同浩然嘅成名作。

▲ 如果大家同筆者差唔多年紀，細個有冇喺「電玩展」見過呢類figure呢？（當年太細個冇錢買，哭＿咗……）

「寫game寫到有情緒病」

畢咗業嘅小熊前後做過好幾份工，雖然全部都係做game，但佢始終都係想做格鬥遊戲，同時又想趁後生學多啲嘢，所以就入咗Microsoft：「嗰陣Microsoft喺上海開新branch，但做咗兩年就因為結婚所以返香港，結完婚之後就決定跳出嚟full-time做indie game。」

如果大家有follow開LF2，相信都知道小熊之後出咗隻game叫Hero Fighter，但可惜嘅係，當隻game推出冇幾耐，就好快畀大陸嘅hacker破解咗，結果浪費咗七年嘅光陰，血本無歸之餘、幾千萬traffic仲去哂人哋個大陸網……

「嗰陣真係好灰機，每次一做update就畀人破解，之後一頹就頹咗兩年，然後透過啲connection搵咗份喺澳洲做嘅短期工作，完咗份約又好好彩咁搵到另一份工，於是就一路留喺澳洲到而家。」

▲ 講到灰機，筆者因為呢篇訪問燃起玩LF2團火，點知用「火佬」玩Difficult去到1-2就死咗，老啦老啦……

「大、細公司各有各好」

眼見而家programmer同developer咁渴市，筆者就問吓小熊究竟有咩tips畀而家嘅年青人，佢就咁講：

「喺大公司學嘢會學得多啲，始終佢哋好多structure同制度都係經時間洗練出嚟，你學到啲大project嘅流程，再拎住大公司個名出去搵工都易好多；至於細公司就好睇你眼光，一旦間startup冒起嘅話，你就真係會忽然間有好豐厚嘅收入，變埋做間公司嘅CTO、分到公司股份等等……」

但無論做大細公司都好，小熊都強烈建議大家盡量做多啲私人project：「如果係讀緊書做呢件事，時間一定會充裕好多，再參加吓啲國際比賽，例如 IOI, ACM ICPC之類，見工嗰陣都會impressive好多。」小熊冇吹水㗎，佢基本上係冇搵過工，一畢業之後好多時都係啲工搵佢。

咁如果係好似小熊咁想寫game又點呢？佢就咁講：「做indie條路一定會辛苦啲，要好有毅力之餘，仲要有運氣。我自己個教訓就係，我磨咗7年時間先承認隻game唔會work，但其實我做咗3、4年就意識到唔太work，如果我嗰時就決定放棄嘅話，我就已經可以行第二條路，唔使再浪費多幾年時間。」

佢仲話搞緊Hero Fighter嗰陣，見到香港啲雜誌都教人點樣破解佢隻game，等大家唔使畀錢就玩到，筆者就再一次意識到，其實香港一直都唔係太尊重知識產權呢樣嘢，中國就更加唔使講啦……

▲ 喺以前Yahoo當道嘅年代，LF2仲紅過Twins、Cookies同F4㗎！

「我要重製LF2！」

如果大家最近有睇開連登或者新聞，都會見到小熊將小朋友齊打交嘅角色變成NFT，睇吓個市場反應係點，又支唔支持到自己重製LF2：「第一代嘅NFT都去咗4分1，我暫時唔會推二代NFT出街，而家諗緊同一萬個玩家一齊打機拍片鑄一個NFT嘅project。」

至於點解會咁做，都係因為小熊唔想LF2變成一隻收費game：

「其實我最想都係越多人玩越好，好似以前LF2估計有過億人玩，嗰陣冇咩計算，隻game竟然紅得好緊要；反而Hero Fighter諗過度過咁耐，再遷就埋個市場，最後個結果都係『蟹』咗，其實仲唔開心。」筆者就問小熊暫時個計劃係咩，佢就話：冇計劃！「目前真係盤古初開嘅階段，而家睇返以前啲code好似睇返細個寫嘅日記咁，暫時每日都係收工用幾個鐘嘅時間慢慢去砌，最希望就係起碼『00後』都會玩呢隻game先，如果反應ok咪再整多啲新content，不過都係見步行步㗎啦，反正計劃永遠追唔上變化。」

作為小朋友齊打交嘅死忠，筆者就問小熊大概幾時會出街啦，點知佢話：「我諗應該要2年左右啦，因為我而家都係收工時間自己一個做。」

咁點解唔搵返浩然一齊搞呢？小熊補充：「浩然而家個職位好高，所以佢淨係返份full-time都忙到傻，但隻game點都會加埋佢個名落去。所以有需要嘅話就會freelance出去搵人幫手做，都係因為咁先會試吓推NFT，睇吓搵唔搵到資金做呢件事。」

喺今時今日嘅香港，「追夢」呢件事已經越嚟越困難，甚至變得遙不可及，呢種無力感相信大家都明白。而筆者就希望大家眼見人到中年嘅小熊都仲堅持做緊自己想做嘅事，會得到少少嘅力量，繼續堅持做自己想做嘅事，共勉之。

後記：訪問完結之後筆者先醒起有兩個問題唔記得咗問小熊，以下係佢嘅答案：「點解叫『小熊』？因為我個名本身有個『鴻』字，所以本身係叫小鴻，但係唔知點解最後變咗做『小熊』；至於最鍾意嘅LF2角色，一定係Davis，因為我13、4歲嗰陣就已經用佢做我啲遊戲嘅主角。」

▲ 唔睇唔知原來初代Davis鍾意「揸刀劈友」……