撰文：Wantedly編集部

今次Wantedly就搵嚟幾位唔同職位、唔同年資嘅「guru」，由「內到外再由外到內」去睇睇呢間公司。或者畀啲背景資料大家先啦：喺2007年成立嘅Guru Online，由一間local digital marketing agency變成其中一間4As嘅聯系會員，而家除咗喺香港上咗市之外，就連中國同台灣都有佢哋嘅分公司，每年淨係攞獎都攞到手軟。

▲ 唔知阿Tom (Associate Account Director)點解會由Finance轉咗嚟做廣告呢？（p.s. 你冇睇錯呀，佢隔離嗰條係「sir」滑梯嚟㗎！）

「唔想成日通宵睇住個市…」

阿Tom讀finance出身，畢業之後一做呢行就成3、4年，同廣告可以話係「九唔搭八」，咁又有啲咩驅使佢入嚟Guru呢？「嗰陣已經唔係好頂得順份工，一嚟悶，二嚟又要成日通宵睇住外國個市，所以就索性轉行，搵返啲自己覺得有趣啲嘅industry去做。」的而且確，其實想轉工或者轉行可以好簡單，甚至可以話好衝動。入咗嚟Guru都差不多6年時間，見證住office越搬越大，由普通local firm變到上市公司，佢反而覺得公司其實冇乜點變過：「因為公司風氣一直都係咁，大家chur嘅時候好chur，平時返工又好flexible。我嗰陣新入嚟同而家嘅junior一樣，都係有『爸爸媽媽』(supervisor)帶住，請返嚟嘅人都係差唔多性格。」差唔多性格咁又即係咩性格先？

「因為Guru請人唔多睇經驗，好睇你有幾想入呢行，『娘』啲講即係熱情，所以請得返嚟嘅多數都好肯試新嘢、有創意、又會同人溝通，或者你可以話大家都有啲『小聰明』。」

▲ 既然係咁，即刻捉個新人Christy嚟睇吓佢有幾「跳脫」先！

「冇諗過同同事咁close」

入咗Social Media team大約2個月嘅Christy，原來係讀「journal」出身，但佢又頂唔順做新聞嘅辛苦，所以就apply咗呢份工：「第一次in已經覺得個環境好舒服，啲人睇落又好後生，同埋嗰時都係『吹吓水』，個氣氛唔似啲傳統公司咁『死』。」佢仲話「second in」嗰陣，佢臨走之前個supervisor無啦啦叫佢講個笑話，呢件事令到佢好深刻，亦都更加想入嚟Guru：

「我諗返成件事都覺得好搞笑，好跳脫，即係我唔expect見工會叫人講笑話，仲要我個笑話好似一啲都唔好笑。」

點知入到嚟Christy就發覺，原來成班人都真係好玩得：「我哋條team講緊平均可能廿幾歲，所以大家都好容易friend，收工都會成日一齊去玩。我『阿媽』又好盡責，唔會掉低我唔理，每日都會睇吓我啲嘢做成點，所以返工雖然有時會chur啲，但都好開心。」

▲ 唔通Ronald (Assistant Account Manager)喺度笑緊Christy講嘅嘢？

「啱做就會做，唔啱做就走㗎啦，好正常」

想當年Ronald為咗入Guru Online，竟然連續3年都send application，名符其實「屢敗屢戰」，佢仲笑住話：「做engineering太悶啦，日日都係做啲重重覆覆嘅嘢，成件事好『死』。」原來Ronald喺呢度已經做咗6年，咁佢又覺得Guru係一間點嘅公司呢？

「我會覺得Guru係一個畀人學到好多嘢嘅地方，尤其是係digital marketing，但真係好睇你啱唔啱。如果你覺得啱自己，就自然會鍾意喺呢度做；唔啱嘅話好快就會走，但最起碼你會知自己鍾唔鍾意做digital marketing。」

所以Ronald對於請人睇得好開：「入得嚟嘅點都會對呢行有興趣，通常都好proactive，所以喺Guru無論你幾『jun』都好，都一定會有say，大家都會聽大家講嘢，可能因為老闆都係咁嘅人，變咗成間公司都會好聽人講嘢。」

▲ 唔知Ellie又諗咩諗到入哂神咁呢？

Ellie就正正係「唔啱做就走嘅例子」，事關佢曾經都離開過Guru：「嗰陣係呢度做咗3年，開始心思思想試吓啲新嘅嘢，所以就轉咗出去做『in-house』，但做咗1、2年就開始頂唔順。」佢話辛苦嘅點係in-house要好多approval，通常想法又會傳統啲，咁啱Guru當時又有條新team，於是就決定浪子回頭，返返嚟呢個家。

Ellie仲話返咗嚟之後開心返好多：「同事關係真係好close，又一齊出去玩，飲吓酒，老闆又會一齊同大家玩，唔似in-house通常都有hierarchy，同事就係同事。」

相信大家好多時都會掙扎究竟做agency定係做in-house好，於是筆者就幫大家問咗Ellie：「其實好睇你性格，如果想穩定嘅通常都會鍾意in-house，有規有矩；但如果你冇咩所謂，咩都想試吓，其實可以試咗agency先，因為你會掂到唔同嘅客、唔同嘅industry，起碼會搵到個方向先，甚至會入埋個客間公司做in-house都會有。」

坊間成日都會話agency好chur，offer又唔高，尤其是係4As，但其實每份工都「有辣有唔辣」，亦都唔會有一間公司係你嘅「model answer」。就好似Christy咁，如果係有興趣又何樂而不為呢？

▲ 後記：大家會唔會有個想法，就係返工可以出trip好爽呢？但Ellie原來一開始入Guru嗰陣，做咗半年就已經可以去澳洲玩吓樹熊：「嗰陣其實好好彩跟到呢個client，本來都覺得爽㗎，但點知仲忙過平時返工，又要顧呢樣顧嗰樣。但而家諗返轉頭，嗰時一個人拆掂哂啲嘢其實好有成功感。」

想第一時間知道Guru Online幾時請人？即刻click呢度再follow佢哋啦！