Career

【Wantedly好工】點樣拆解三大startup中伏位？Startup人工又點計？

筆者近日讀到篇文章，內容都係講startup好容易有財政危機，做嘢又辛苦，人工又低，唔似大公司咁穩定同舒服。當然，startup的確係可以《十面埋伏》，但同樣都可以有好多機遇，所以筆者今次就想同大家講吓，點樣先令自己冇咁容易中伏呢？

2020/10/09

老老實實，無論份工幾好幾有impact，咁大家都要食飯，人工都係緊要嘅。所以除咗喺interview嘅時候直接問個founder之外，大家都可以上Google起吓間公司底。

當然你唔會喺Google搵到哂所有資料，但最起碼你都會睇到間公司有幾多round funding、有幾多media feature過間公司、有冇keep住請新postitions（即係加headcount啦）之類，咁你都大概可以摸到間公司財政上健唔健康。

一句講哂：返工其中一樣最緊要嘅，就係班同事，事關你每日對住佢哋嘅時間，真係多過屋企人。而好多時「頂唔順」啲同事或者老闆，都係轉工嘅原因。

咁你點先會知道究竟班同事，甚至個founder係咪啱你嘅人呢？Interview就係你唯一嘅機會。

（題外話：如果大家想知多啲點樣估個interviewer真唔真誠，歡迎Facebook / Instagram DM話畀筆者知～）

除此之外，仲有另一樣好簡單嘅嘢可以做：問吓可唔可以見吓條team。如果個founder或者HR主動offer就最好啦。而喺見條team嗰短短5至10分鐘，你大概都可以sense到究竟佢哋本身friend唔friend，又或者最起碼見到個工作環境係點。

講明先，做得startup真係唔好諗住會有啲咩傳統公司嘅福利，亦都係因為咁，你更加要知道究竟會剩低啲咩福利。

最簡單講可能返工會flexible好多，home office係家常便飯，annual leave可以有勁多日（前提係你要做得哂啲嘢先），但呢啲好多時都係「空口講白話」，所以記得記得要睇清楚份contract。

唔單只startup，好多中小企都有啲古惑，筆者嘅朋友就係最好嘅例子：明明interview講到明未過probation都會有AL，但簽完contract先發現份約唔係咁寫。所以記得、記得睇清楚份contract，覺得怪怪哋就要問啦。