你估個個都咁好命，有個出完首期，仲順便幫手供埋層樓嘅阿爸阿媽咩……不過呢，做唔成被選中嘅孩子，又唔使氣餒住嘅！話唔定，你都可以好似Synergy Biz嘅員工咁，搵到份包住宿嘅筍工呢～

事不宜遲，畀啲掌聲有請：Synergy Biz嘅市場經理，Michelle同Eiswein！（啪啪啪啪啪啪啪）

肯包員工住嘅，公司規模應該有返咁上下啩？

Synergy Biz原本係間傳統積樓，幾年前佢哋就係睇中咗香港土地同住屋資源錯配呢個問題，所以將轉型做一間主打「共用空間平台」嘅公司。喺短短幾年之間，佢已經成功發展咗幾個共用項目喇，而當中就有3個Co-living（共居空間）同埋8個Co-working（共用工作空間）～

共居空間喺香港有冇得發展？

答案係梗係……有啦！正所謂「天時地利人和」！喺香港地，有邊個業主唔想收貴租賺錢？又有邊個後生嘅唔想要一個負擔得起租金嘅私人空間吖？但市面上冇住屋可以乎合呢幾個條件……咁啱呢間公司做緊嘅嘢，就正正係一個解決方法嚟喇～再加上社會同科技不斷咁進步，人同人之間嘅關係就越嚟越遠……但成世人流流長，點都要認識下唔同社交圈子，同唔同嘅朋友交流下嘅，原理咪就好似讀大學想要有Hall Life咁咋嘛。

入正題喇，公司真係包住？

喺Synergy Biz，只要你夠膽講，乜嘢都有機會發生～就好似本身已經住係旺角「書匯」（即係公司其中一個Co-living Space) 嘅Michelle, 某一日口痕同老闆講，話可唔可以唔交租當做公司benifits，點知老闆又話好，於是佢就從此過住唔使交租,幸福愉快嘅生活……咪住！邊有咁大隻蛤乸隨街跳吖？Michelle平時收工返到去都仲有嘢做㗎，例如要收集班「鄰居」嘅意見，同埋留意下生活環境細節，諗下有咩方法可以提升服務質素咁囉～

雖然份工好似唔簡單，但聽落Michelle都應該好享受，佢仲同我哋分享咗件威水史𠻹～未入去住之前，佢以為廚房唔使咁多設施，可能有一兩個電磁爐就夠，點知住落先發現，原來好多住客都鍾意煮嘢食同其他人分享，於是佢就同公司提議，不如起多個共用廚房囉～由買咩電器到點樣管理，佢都仆心仆命咁落手做。最後可以成功咁搞掂咗件睇落冇可能完成嘅事，Michelle就覺得好有滿足感咁話。

老闆咁信你哋嘅？

喺Synergy Biz入面，人人平等：老闆冇架子，即使係一件無關痛癢嘅事，佢都會一齊處理，老土啲講，即係會同你共同進退；做細又唔會當自己係小薯嘜，有咩意見都會隨時捉老闆入房直接傾。作為一間啱啱起步嘅公司，班同事又有共同信念去推動Co-living呢壇嘢，做老細嘅，冇奶油唔舉腳支持啩！

你哋平時會點分工呀？

由於公司仍然喺Start-up階段，所以喺冇一個既定嘅框架下，只要你搞得掂手頭上嘅工作，就可以自由參與唔同範疇的計劃，鍾意做多啲嘅，去埋做跨部門討論又得，得咗！同大公司比，可能Synergy Biz嘅工作環境係冇咁穩定（可能要O下T咁啫），但呢度冇Old Seafood（好似係），又唔會有一個人話自己講嘅嘢完全啱晒（應該係），所以只要諗到任何可以令公司進步嘅方法，都可以大膽講出嚟，唔使驚畀人Ban！

點樣嘅人先啱入Synergy Biz做？

佢哋發展嘅共居項目，大至地產，細至一個單位嘅業主都會合作，面對嘅嘢亦都會有好多變化，所以想入嚟做嘅人，除咗要有心理準備同唔同嘅同事、客人溝通，仲要識喺唔同嘅突發情況應變～另外，呢間公司好著重員工嘅自身諗法，佢哋唔係想要個人哋叫你行就行，坐就坐嘅乖寶寶，相反係要一個有自己一套思維嘅人。

後記

Synergy Biz嘅工作自由度同彈性都好似幾大，但前提係：員工要自律同埋積極㗎～只有對份工好有熱誠同執著嘅人，先會不停諗辦法令自己同公司一齊成長，先會感受到當中嘅成功感㗎嘛！「做嘢最緊要有團火」，無錯，做嘢無夢想，同條鹹魚有咩分別？

.　.　.

💼 Synergy Biz 請緊人呀！

.　.　.

成立於2010年，Wantedly是一家於東京起家的上市企業 。我們的目標為"Create a world where work drives passion" — 以才能及對公司的興趣將求職者與僱主連繫起來，取代重視利益關係的傳統配對。在日本有超過27,000間公司使用Wantedly，每月活躍用戶達到250萬個。我們的服務已拓展至新加坡，現在更進駐香港！

入嚟睇吓我地嘅搵工平台有咩唔同啦：
👉 http://wantedly.com/projects