This page is intended for users in Singapore. Go to the page for users in United States.

【WantedlyHK團隊特輯】⑥咩年代呀?大學畢業就「大」哂咩?

作為Wantedly最後生嘅成員, Kamila Lui暫時喺度做咗短短一個月,但佢已經榮登Wantedly最「九唔搭八」嘅榜首,仲誇張過/粵劇特朗普/得不到分數/。

「別人笑我太瘋癲,我笑他人看不穿」

大家唔好以為「九唔搭八」就等於負面喎,筆者嘅意思純粹係Kamila喺傳統女名校出身,「好哋哋」有大學唔讀,反而去咗兆基創意書院,畢業之後仲要冇全職投入佢嘅藝術世界,反而走入呢個「血淋淋」嘅商業社會。

唔好睇佢好似好亂嚟咁,Kamila諗嘅嘢仲正常過啲「正常」人:「當其時讀中學嗰陣經歷過『雨傘』,就開始思考『讀書』呢件事嘅本質,究竟學習係咪真係咁『死』,對住本書照讀然後考好個試就得。係咪個個都要爭住入大學、打份工、買層樓,咁就一世呢?」

所以Kamila選擇咗行另一條路,你大可以話佢「歪」也好、「錯」也好,但呢個都係佢嘅選擇,而佢都冇後悔:「嗰陣入兆基讀Performing Arts,讀完之後都要搵食㗎,你又唔係唔知喺香港全職搞藝術基本上冇乜可能,咁咪唯有搵工囉,weekend呢啲得閒啲嘅時間先去做返啲自己想做嘅project同programme。」

大學學位等於一切?

而佢打嘅第一份工,係一間小型補習社嘅marketing:「嗰陣好辛苦㗎,真係要一個打十個咁滯,又要幫佢寫website、design啲materials;又要做Facebook搞佢個page。咁都唔緊要,但當時另一個老闆又覺得其實唔係好需要呢個post嘅存在,想法都係比較傳統,所以做咗三個月就走咗了。」

東家唔打就自然要打西家,又要返返去搵工嘅「輪迴」,而佢只有「無奈」呢兩個字去形容呢件事:

「喺香港地,只要你唔係U grad又或者冇工作經驗,啲人就會覺得你唔識做嘢,其實呢個想法真係有啲問題。究竟個degree係咪真係可以證明到咁多嘢呢?就好似我同朋友有個藝術組織咁,之前啲大機構搵我哋合作搞workshop嘅時候,好似我哋教返佢哋啲staff做嘢咁,但講緊佢哋先係主辦單位。」Kamila講到呢度都要飲啖咖啡,抖返順條氣先。

(筆者聽完忽然間諗起個朋友間公司,佢哋最近請咗個英國回流嘅大學生,但結果中文又唔得,英文又唔掂,做嘢又不停做錯,真係名符其實「豬隊友」。)

話分兩頭,所以Kamila嘅搵工過程可以話係一波三折:「嗰陣搵第二份工嘅時候,咪又係用返啲傳統網站囉,但搵搵吓就發覺唔會搵到自己想要嘅工,因為嗰啲公司同平台間間都好著重你個degree同工作經驗,而兩樣都『冇乜』嘅我其實冇任何選擇。」就係咁,佢就喺Facebook度發現咗Wantedly,仲要咁啱請緊人。

打工/讀書=學習

入咗嚟呢度只有短短一個月嘅時間,莫講話大家,就算佢話Wantedly點好點好,筆者都唔信啦。但呢度畀佢嘅第一印象又係啲咩呢?「唔知係咪因為我最細個,又啱啱入嚟,所以大家都好『錫』我。同埋就算我只係入咗嚟一個月,team meeting嘅時候大家都會問同真係聽我嘅意見,而唔係聽完就算咁。」

年紀輕輕嘅Kamila雖然行緊一條好似咁「九唔搭八」嘅路,但佢對自己嘅將來其實有一個大方向──學習。

「反正呢個世界從來都唔係你想點就可以點,所以詳細嘅計劃我就冇㗎。但我都幾肯定自己會去外國讀書,真正咁『學習』而唔係『讀書』;就好似我而家返工咁,每日都係一個學習嘅過程,而唔係以前咁『死刨爛刨』再應付啲考試。」

後記:唔講唔知,原來Kamila有個「花名」叫阿蛋,而至於個原因係咩呢?原來係因為以前佢開Twitter嘅時候冇用icon,而系統preset嘅頭像就係一隻蛋。果然Kamila個花名同佢嘅經歷都一樣咁「九唔搭八」~

未睇之前嘅訪問?🤨可以去樓下喎👇🏼

睇吓有咩好工啱你啦 👇🏼

成立於2010年,Wantedly是一家於東京起家的上市企業 。我們的目標為"Create a world where work drives passion"以才能及對公司的興趣將求職者與僱主連繫起來,取代重視利益關係的傳統配對。在日本有超過30,000間公司使用Wantedly,每月活躍用戶達到120萬個。我們的服務已拓展至新加坡,現在更進駐香港!
Wantedly, Inc. (Hong Kong)'s job postings
Anonymous
2e29a38d dc72 4b83 9654 049b719a0344
1 Likes
Anonymous
2e29a38d dc72 4b83 9654 049b719a0344
1 Likes

Weekly ranking

Show other rankings

Page top icon