This page is intended for users in Singapore. Go to the page for users in United States.

賺到盡:返工=自己搞生意?!

撰文:Wantedly編集部 | 2018-10-08

而家年輕一代較自主又多諗頭,周圍都講緊startup,自己搞生意嘅風氣的確係十分之盛行,之但係個個都話創業,唔通個個都咁易創業咩? 會唔會有辦法可以喺大企業返工,又享受到呢種「自己話事」嘅模式呢?企業sales可能幫到你。

唔好以為sales就一定係喺舖頭做前線,今日就搵嚟HKBN 企業方案Sales Team嘅Mingo Tsang同Ray Lam…畀多啲指導你哋,一齊分享做sales嘅樂趣!

「要Sell啲咩人?」

呢條team主要係將商業寬頻呀、話音呀、雲端服務呀、流動通訊呀、Wi-Fi方案呀等等唔同嘅通訊科技產品同埋企業方案,sell畀各行各業嘅商業客戶,配合佢哋嘅電訊服務需求,等佢哋可以時刻同客戶連繫,更加容易做生意。

「有冇咁多客要Sell呀?」

你是但行入一幢商廈,數下個水牌有幾多間公司,或者喺條街度睇下有幾多舖,就知呢行嘅market有幾大㗎喇~皆因無論係大公司定細公司,無論咩行業都好,都至少總要有一兩樣電訊產品先可以運作到。當然,每一次sell客時,根據佢哋嘅實際需要度身訂造一個啱用嘅plan,咁就更加無往而不利啦;加上HKBN喺呢幾年不斷擴充規模同發展業務,越嚟越多產品可以賣…換句話講,即係大家搵錢機會多咗,條team又好吃香咁囉。

喺呢個去邊都要上到網嘅世代,寬頻、Wi-Fi同手機上網嘅Demand絕對係多過Supply — 啫係唔駛驚搵唔到客囉!

「放假都要見客?」

星期一至五已經日日都見客㗎啦,星期六、日都仲要對住佢哋,唔好喇啩?唔使驚住,講緊嘅「見客」,其實只係同班啱咀型嘅客,放假約埋一齊去玩啫~

Ray話:「平時出去開會見嘅客好多都係IT人,而自己又係做呢行,傾吓傾吓就會好快熟落~所以得閒就會一齊去行下展覽,了解最新業界資訊,有唔少仲friend到會約埋一齊去跑步同行山添!」

「跑唔到數實畀人捽啦!」

做得sales,話唔使跑數就呃你嘅!但呢條team唔會好似其他公司咁,一嚟就開同事波,相反會透過傾偈了解下開唔夠單嘅原因~

喺HKBN做咗七年有多,由MT開始做到帶領住一大條team 嘅Mingo指:「如果同事係有愛情、家庭、朋友等等嘅私人問題困身,會同佢傾下有咩方法解決,睇下有無嘢幫到手;如果係銷售技巧、個人態度呢啲影響到工作表現,就會派個leader同佢一齊見客,之後再畀返相應嘅建議,幫助同事去提升成功機會;如果只係因為對產品嘅認識唔夠,公司亦會有support畀你。」啫係一句講晒,公司會全方位360度無死角咁幫你手解決問題!

「返工=自己生意!」

Mingo同Ray話佢哋會一邊返工,一邊搞自己生意…哦!你哋秘撈…講下咋,其實係公司有個共同持股計劃(Co-Ownership Plan),邀請同事選擇係唔係將一部分人工投資落公司,如果到咗共同目標,公司就會俾返你相應嘅回報,實行齊齊同公司拍住上。公司做得好,股價自然上,佢哋自然又可以賺更多,咁班同事除咗自己份糧同佣,就可以有額外嘅回報喇!(問到回報賺咗幾多時,佢兩個都笑住話:「唔少㗎~」)

Sales呢個行業本身就係做得多賺得多,而呢個計劃正正可以提供一個平台同資源,令到同事對自己嘅工作更加上心,同公司目標一致,睇嘅嘢就更加長遠…如果肯畀心機去做嘅,自然有前途,又有錢途啦!

企業方案高級銷售經理Mingo Tsang(右)及 商業銷售客戶經理Ray Lam(左)

「唔使返Office做嘢咁Free?」

喺度做嘢返工放工都唔使打卡,下晝出去見完客又唔會有人逼你返公司,上司又唔會長期mon實你…都真係幾free㗎!不過,呢啲嘢都係建基於員工嘅自律同埋責任感嘅,加上每個sales都有自己嘅目標要跑,就好似自己經營緊一盤生意咁,無可能唔落力,咁仲使咩下下check住晒喎,有時間都不如等啲同事喺出面見多一兩個客好過啦~

「把口係咪要𠺘過油先做得?」

吹得嘅人喺sell人方面固然著數啲啦,但內斂嘅又未必會蝕底嘅,Ray就話:「有個同事平時唔多出聲,但個人又細心又有條理,所有細節都跟到好足,試過同客人面都唔使見,就已經成功透過email同電話開單啦!」完美示範咩叫唔聲唔聲,嚇你一驚。

佢話與其喺present嘅時候講到天花龍鳳,不如踏實啲take action仲更加實際,如果跟得好,客人隨時仲會將你介紹畀其他公司㗎,咁生意就愈來愈多啦。

「冇經驗?使乜驚呀!」

你可能會諗:冇做過電訊業,對B2B冇乜認識,又唔係做sales出身,咁實唔請啦…

Mingo都好老實咁話有相關對企業客戶經驗,的確會優先考慮嘅,不過如果你對呢行有興趣,想獨立工作又想搵多啲錢,即使無電訊底其實都適合加入呢條team~只要你肯學肯做,都唔難上手!事關公司會為新入職嘅同事進行兩個禮拜嘅product training、上司同 Solution Consultant 又會陪你一齊見客,等你學識多啲技術層面嘅嘢,時不時又有top sales些牙自己嘅開單技巧,所以唔使驚,you are not alone~

Corporate/ B2B Sales其中一個吸引之處就係佣金較其他種類嘅Sales高,同時亦有機會學到更多行業技術知識。

「後記」

小編聽完Mingo同Ray介紹佢哋條Team,唔知點成個腦都係「一二三四五六七,多勞多得」~(黑人問號)

以下係香港寬頻請緊嘅職位!💪🏼

🔹 Account Manager (Commercial Sales)
🔸 Database Administrator
🔹 Web Developer
🔸 技術人員

睇吓有咩好工啱你啦 👇🏼

成立於2010年,Wantedly是一家於東京起家的上市企業 。我們的目標為"Create a world where work drives passion" — 以才能及對公司的興趣將求職者與僱主連繫起來,取代重視利益關係的傳統配對。在日本有超過30,000間公司使用Wantedly,每月活躍用戶達到120萬個。我們的服務已拓展至新加坡,現在更進駐香港!
Hong Kong Broadband Network's job postings
Anonymous
Anonymous

Weekly ranking

Show other rankings

Page top icon